En data 12 de febreiro de 2015, o Tribunal Superior de Xustiza de Galiza anulaba as determinacións que contía o Plan Xeral de Ordenación Municipal de Valga, respecto da clasificación dos terreos SI-07-POL01 e SI-07-POL02 como solo urbanizable industrial e as estradas que lle ían dar servizo. A primeira clasificación correspondería cos terreos da parte da Medela, e a segunda cos de Magariños. A sentenza chega a dicir que as xustificacións dadas polo Concello de Valga e a Xunta de Galiza para a creación do polígono industrial “baséanse en datos que non son certos”, concluíndo que “o anterior planeamento clasificaba como solo non urbanizable de protección forestal algúns terreos que o novo inclúe no sector de solo urbanizable de uso industrial SI-07. A eses terreos élles aplicable o disposto na Lei 9/2002 para o solo rústico en virtude do establecido na súa Disposición transitoria primeira, apartado 1.f). De acordo co artigo 14.1 desta lei, como regra xeral un solo rústico protexido non pode ser clasificado como solo urbanizable”. Malia a rotundidade desta sentenza, o Concello de Valga e a Xunta de Galiza recorreron ao Tribunal Supremo, mais a sentenza deste, de data 1 de xuño de 2016, volveu corroborar a ilegalidade da clasificación dos terreos como solo urbanizable industrial da Medela e Magariños.

A pesar da existencia de dúas sentenzas moi claras e rotundas, tanto o Concello de Valga como a Xunta de Galiza nunca aplicaron os fundamentos xurídicos destas que impedirían a execución dun polígono industrial en solos clasificados anteriormente como rústicos. Así, o PXOM de Valga segue considerando os terreos, tanto da Medela como de Magariños, como solo urbanizable industrial, ao igual que a Xunta de Galiza no Sistema de Información de Ordenación do Territorio e Urbanismo de Galiza. Unha consecuencia da non execución das sentenzas é que os terreos da Medela teñen a clasificación de solo industrial en catastro, polo que os propietarios está pagando a contribución como solo urbano. Outra implicación é que, tras recibir dilixencias de notificación enviadas polo Concello de Valga, os propietarios con parcelas localizadas no perímetro dos terreos clasificados como solo urbanizable industrial na Medela e Magariños, teñen a obrigación de limpar os terreos para o cumprimento das faixas de protección dos núcleos habitados para impedir o risco de incendios forestais, obrigación que non existiría se o Concello de Valga e a Xunta de Galiza tivesen executado o fallo das sentenzas.

O recente proxecto de ampliación do vial da Medela, que no proxecto xustifícase como a “dotación dun acceso apropiado ás parcelas agrícolas”, non deixa de ser unha estrada que daría servizo ao polígono industrial. No anexo de expropiacións do proxecto, asinado polo arquitecto municipal, todas as parcelas foron clasificadas como solo rústico, cando parte delas deberían ter sido valoradas como solo industrial, co consecuente incremento no prezo de expropiación. Isto é unha mostra máis da falta de rigor do goberno municipal, que á hora de expropiar non considerou as parcelas como solo urbano, tal como figuran no catastro, enganando ao propietarios soamente para pagar un menor importe de expropiacións.

O 25 de xaneiro de 2024 publicouse no Diario Oficial de Galiza a aprobación definitiva da modificación puntual número 2 do Plan sectorial de ordenación de áreas empresariais de Galiza (PSOAEG). Un dos polígono industriais que aparece é o de Valga, situado integramente na Medela, ao oeste da estrada N-550. Trátase dunha área de 221.177 metros cadrados que se desenvolvería en tres fases. A Fase 1 (37.639 m2) correspóndese case na súa totalidade cunha empresa xa existente de manufactura de madeira, mentres que a Fase 2 (93.741 m2) e a Fase 3 (89.797 m2) sería o ámbito industrial a desenvolver propiamente dito. Esta nova delimitación elimina toda a parte de Magariños, mais na Medela coincide case na súa totalidade co solo industrial anulado anteriormente polas dúas sentenzas e soamente se elimina a parte máis situada ao norte onde está xa emprazada unha subestación eléctrica. Para a execución da Fase 3, segundo o descrito no plan, conectarase á N-550 mediante “un enlace a diferente nivel existente no lugar de A Medela”, o que suporía aínda máis expropiacións e afeccións das previstas.

O goberno municipal do Partido Popular, en lugar de dar publicidade a este plan entre a veciñanza da Medela, o único que fixo foi alegar que o proxecto de polígono industrial non estaba “en estudo”, tal como indicaba a Xunta de Galiza, se non que se atopaba xa nunha situación de “en proceso”. É dicir, o goberno municipal afirmou que o polígono industrial da Medela está xa iniciado, probablemente asumindo que a subestación eléctrica forma parte deste.

A ocultación deliberada da información impediu que veciños e veciñas tiveran coñecemento real deste novo intento para crear un polígono industrial na Medela, situado practicamente na mesma localización do que foi anulado pola xustiza; e nomeadamente a Fase 3, emprazada na súa totalidade en terreos rústicos tal como os clasificaba o anterior PXOM e segundo o disposto nos fundamentos xurídicos das sentenzas. Ante esta falta de transparencia e da indefensión veciñal, o grupo municipal do BNG de Valga rexistrará unha batería de preguntas dirixidas ao alcalde e á Xunta de Galiza respecto á realización dun polígono industrial na Medela, o cal só se levaría a cabo cunha modificación do PXOM e o desenvolvemento dun novo plan parcial. Esta falta de información impediu que a veciñanza tivera coñecemento deste novo proxecto, que parcialmente é o meso que foi anulado polas sentenzas do Tribunal Superior de Xustiza e do Tribunal Supremo.