A senadora do BNG, Carme da Silva, vén de rexistrar unha iniciativa no Senado para instar ao Ministerio de Transportes a levar a cabo actuacións urxentes de mellora da seguranza viaria na N-550 ao seu paso polo núcleo urbano de Ponte Valga. A formación nacionalista demanda un plan de actuación integral que inclúa medidas de remodelación das interseccións, a instalación de pasos peonís elevados e a implantación de elementos para o calmado do tráfico.

Durante a visita a Valga, Carme da Silva estivo acompañada polos concelleiros da formación nacionalista Fran Devesa e Miguel Lois, e polas compañeiras Sandra Seoane e Susana Barreiro, que percorren a zona coñecendo a realidade que viven cada día os veciños e veciñas. A senadora nacionalista aproveitou a ocasión para anunciar o rexistro de iniciativas para garantir a mellora da seguranza viaria na N-550 ao seu paso polo termo municipal.

A N-550, que recibe o nome de Avenida da Coruña ao seu paso por Ponte Valga, constitúe a principal travesía urbana da localidade. É especialmente grave que, nos máis de 1.000 metros polos que a estrada percorre o solo urbano, só exista un paso de peóns e un semáforo, que ademais funciona de maneira irregular, obrigando aos veciños e veciñas a cruzar en condicións perigosas. Segundo denuncia o BNG, esta vía segue a manter unha configuración propia dunha estrada interurbana, en lugar de adaptarse á súa realidade urbana. Actualmente, carece de elementos básicos de seguranza viaria e accesibilidade, a pesar de ser a rúa central da localidade e albergar servizos esenciais como o consistorio, establecementos sanitarios, paradas de autobuses escolares, comercios e estabelecementos de hostalería.

Segundo destaca Carme da Silva, "a situación actual da Avenida da Coruña en Ponte Valga pon en risco á veciñanza, xa que só conta cun paso de peóns ao longo de todo o seu trazado urbano, obrigando ás persoas a cruzar a estrada en condicións inseguras". Ademais, a senadora sinala que "os vehículos circulan a velocidades excesivas, sen que existan medidas eficaces de acougado do tráfico nin de control da velocidade".

O BNG pide ao Ministerio de Transportes actúe de inmediato para dotar esta travesía urbana dos elementos necesarios para garantir a seguridade viaria. Entre as medidas propostas inclúese a instalación de novos pasos peonís elevados, a habilitación de cambios de sentido para facilitar a mobilidade, a limitación da velocidade máxima a 30 km/h no tramo urbano e a mellora da accesibilidade peonil. O BNG de Valga trasladoulle a Carme da Silva as seguintes actuacións urxentes:

• Implantación de novos pasos peonís seguros no cruce de Cedelo, na Praza Vicente Cousiño e na contorna da Casa do Concello.
• Redución do límite de velocidade a 30 km/h no tramo urbano.
• Construción dunha rotonda no cruce de Baño e Raxoi, substituíndo ás dúas medias lúas existentes.
• Reforma integral das beirarrúas, eliminando barreiras arquitectónicas e garantindo a accesibilidade, algo que non se conseguiu coas obras de “mellora” que se realizaron na marxe esquerda, e que actualmente se están a executar na marxe dereita.
• Renovación do asfaltado da estrada ao seu paso polo termo municipal.

A formación nacionalista lembra que a titularidade da N-550 é estatal, polo que correspondería ao Ministerio de Transportes asumir a súa adecuación ás exixencias actuais en materia de seguridade viaria e mobilidade sostible. Neste sentido, o BNG sinala ao Goberno central a necesidade de colaborar co Concello de Valga e deseñar e executar un proxecto de reforma integral da Avenida da Coruña, de xeito que deixe de ser unha barreira na trama urbana e se converta nun verdadeiro eixo vertebrador da localidade. "Mentres non se leve a cabo unha actuación integral, é imprescindible que se acometan melloras urxentes para garantir a seguridade viaria da veciñanza de Valga" afirma Carme da Silva.

O BNG considera imprescindible que o Ministerio de Transportes, en colaboración co Concello de Valga, desenvolva un proxecto integral para transformar a Avenida da Coruña nunha rúa urbana segura, que mellore a calidade de vida da veciñanza e fomente a mobilidade sostible e a integración paisaxística. “Desde o BNG de Valga comprometémonos a seguir traballando para que a N-550 deixe de ser unha estrada perigosa e para que Ponte Valga sexa, por fin, unha rúa para vivir”, conclúe Fran Devesa, voceiro municipal do BNG en Valga.