O BNG de Valga quere trasladar a máis enérxica condena polo asasinato, a semana pasada, de Teresa de Jesús, traballadora do Servizo de Axuda no Fogar do Porriño, quen perdeu a vida mentres desenvolvía o súa labor profesional nun domicilio. Un feito tráxico que conmociona profundamente e que pon de manifesto, de forma dolorosa e inxusta, os riscos reais aos que se enfrontan cada día algunhas das traballadoras deste servizo esencial, moitas veces esquecidas polas administracións.

A morte de Teresa non é un caso illado, senón a consecuencia máis extrema dun modelo de coidados precarizado, infrafinanciado e abandonado institucionalmente. A realidade do SAF de Valga é a dunha prestación fundamental para as veciñas e veciños, mais que se mantén grazas ao esforzo e compromiso persoal das súas traballadoras, que levan anos denunciando sobrecarga laboral, ausencia de medidas de prevención e unha notable falta de apoio profesional no desenvolvemento do seu traballo. Esta precariedade estrutural ten unha orixe ben identificada: a insuficiencia crónica de financiamento por parte da Xunta de Galiza, que deriva nos concellos a responsabilidade de xestionar un servizo que non lles é propio, sen garantir os recursos necesarios, nin persoais, nin materiais.

Neste contexto, o BNG de Valga considera imprescindible que o Concello de Valga dea un paso adiante e actúe con responsabilidade, xa que mentres a administración autonómica mantén este modelo insostible, as traballadoras seguen expostas a situacións de risco, sen a protección mínima que debería estar garantida. Por todo isto, o grupo municipal do BNG levará ao pleno municipal a petición da negociación, elaboración e posta en marcha dun protocolo municipal específico de prevención e protección para as traballadoras do SAF. Este protocolo debe incluír medidas claras para avaliar os riscos nos domicilios, mecanismos de resposta inmediata ante agresións ou ameazas, e un acompañamento efectivo, tanto en materia de seguridade, como de atención psicolóxica no caso de sufrir situacións violentas.

Ao tempo, é obriga do Concello de Valga instar á Xunta de Galiza a realizar un cambio profundo no actual modelo de coidados, partindo dun financiamento realista e suficiente que garanta a viabilidade do SAF como servizo público. Non se pode seguir mantendo un acordo de financiamento que establece unha tarifa de só 12 euros por hora, cando o custo real que están a asumir o concello é de case 20 euros por hora. Isto significa que os concellos están asumindo case a metade do custo real do servizo, o que asfixia os seus orzamentos e compromete gravemente o funcionamento doutros servizos municipais básicos.

O que ocorreu no Porriño debe ser un punto de inflexión. Non se pode permitir que se perda unha vida máis e cómpre actuar con decisión e responsabilidade, construíndo desde o local un sistema de coidados digno, seguro e xusto. O BNG de Valga reitera o seu compromiso cun modelo de atención ás persoas baseado no respecto, na dignidade laboral e na protección efectiva das traballadoras. É hora de deixar atrás a política das palabras baleiras e garantir tamén a seguridade de quen coida.